Suivre ce blog
Administration Créer mon blog
22 janvier 2015 4 22 /01 /janvier /2015 16:07
Ingabo za Kongo ngo zirahisha abarwanyi ba FDLR mbere yo kubagabaho ibitero

Umwe mu barwanyi ba FDLR wari mu ngabo za Kongo avuga ko ingabo za Kongo zirimo gufasha FDLR kuva mu birindiro ikavangwa n’abasirikare ba Kongo kandi ari zo zigomba kubagabaho ibitero.

Caporali Dukuze Victory watashye mu Rwanda taliki 21/01/2015 avuye muri Rutshuru mu gace ka Rubare hafi ya Pariki y’ibirunga avuga ko ibikorwa byo gufasha abarwanyi ba FDLR kwihisha bikorwa n’umuyobozi wa batayo y’abakomando ba UUR (Unité de réaction rapide) yahoze iyoborwa na Col Mamadou Ndala.

Caporali Dukuze asanzwe akorera muri Burigade 1300 iyobowe na Col Mateso uba Bunagana kuva M23 yatsindwa igahungira muri Uganda, akaba yari umurinzi wa Col Byinshi Gakunzi Moise ukorera Rubare hafi ya Rumangabo.Abarwanyi ba FDLR bari ahitwa Tongo muri Rutshuru bari ngo bazanwa mu kigo cya gisirikare kiri Rumangabo bagahabwa imyenda y’ingabo za Kongo ubundi bagashyirwa mu myanya muri Pariki y’ibirunga.

.Dukuze kandi avuga ko atari ubwa mbere ingabo za Kongo zifatanya na FDLR kuko ngo urugamba rwo kurwanya M23 yari arurimo kandi ingabo za Kongo na Monusco zafashijwe na FDLR yahawe ibikoresho birimo imbunda n’amasasu.Icyo gihe ngo ibikoresho bya gisirikare FDLR yahawe ntiyabisubije Leta ya Kongo kuburyo ingabo za Kongo zitatinyuka kurwanya FDLR bitewe n’ibikoresho ifite no kumenyera kuba mu mashyamba.Col Rama usanzwe uba Rumangabo ngo niwe ukora ibikorwa byo kuvana abarwanyi ba FDLR Tongo bagahabwa imyenda y’igisirikare cya Kongo ubundi bagashyirwa mu gisirikare mu gace ayobora hamwe n’agace kayoborwa na Col Mateso Tdedha Jean de Dieu wayoboraga Cpl Dusabe.

Tumwe mu duce abarwanyi ba FDLR bashyirwamo turimo Bukima, Ngugu, Nkokwe, amarembo ya Pariki ujya Rugari, Kibumba hafi y’ishyamba ry’ikirunga cya Nyiragongo ku musozi witwa Mujoga na Buhumba, Rutare, Karengera, Katembwe na Runyoni.

Bamwe mu barwanyi ba FDLR bivanze n’ingabo za Kongo harimo Lt Munyambibi Mouhamed uvuka mu karere ka Nyabihu ahitwa Mukamira n’undi witwa Cpl Ndayambaje Jean de Dieu uvuka mu murenge wa Nyakiriba mu karere ka Rubavu.Aba ngo bari Kibumba hafi y’umupaka w’u Rwanda kuko babonywe n’abaturage bo mu Rwanda naho Maj Fidel akaba ari Buhumba ahari antene hafi y’ikigo cy’abasirikare ba Monusco.

.Umwe mu basirikare ba FARDC ufite ipeti rya Majoro taliki 02/01/2015 akaba yari yatangarije Kigali Today ko abarwanyi ba FDLR benshi bakuwe mu duce Rutshuru, Masisi, Walikale na Lubero hamwe n’abakuwe Zambia na Kongo Braza-Ville bazanywe hafi y’umujyi wa Goma ahitwa Rusayo na Kibati kugira ngo bategure ibikorwa byo kugabwaho ibitero.

Uyu musirikare avuga ko nubwo ibitero bya FDLR byagombaga kuba, hari gahunda y’uko abarwanyi ba FDLR bagomba kuraswa begerezwa umupaka w’u Rwanda maze intambara yo kubarasaho yatangira bagahita binjira mu Rwanda bakagira aho bafata maze bagatangira ibikorwa byo gusaba imishyikirano

.Cpl Dukuze avuga ko nubwo imyiteguro yo kurasa FDLR ihari ngo ntacyo izageraho, we akaba ahisemo kuza mu Rwanda kuko yumva akumbuye umuryango we aheruka muri 2003 aho yakuwe ajyanwa Minembwe kuragira inka ariko akaza gushyirwa mu gisirkare cya Kongo muri 2005.

Cpl Dukuze avuga ko kurwanya FDLR bikozwe n’ingabo za Kongo byagorana kuko uretse kuba izi ngabo zikorana na FDLR ngo muri FARDC harimo FDLR zihinduye Abanyekongo kandi benshi bakaba bari mu mutwe wa Unité de Réaction Rapide.Mbere ya taliki 02/01/2015 umutwe wa FDLR wahawe na ICGLR na SADC ngo ube washyize intwaro hasi, abayobozi b’igisirikare cya FDLR bagiye bakora amanama atandukanye yo kwitegura uburyo bazahangana n’urugamba, inama ya nyuma bakaba barayikoreye Rusayo hafi y’umujyi wa Goma

.Nyuma y’iyo tariki nta cyakozwe kuri FDLR ahubwo harashwe umutwe w’inyeshyamba z’u Burundi ukorera muri Kivu y’Amajyepfo, mu gihe FDLR yagombaga kuraswaho yari muri Metero nke uvuye ahari ibirindiro by’ingabo za Monusco nk’uko bigaragazwa n’ikarita yakozwe mu kwezi k’Ukuboza 2014.

source: K2D

Lt Col Ramazan aka Rama uyobora abakomando ba FARDC mu duce twa Rumangabo agafasha FDLR. - See more at: http://kigalitoday.com/spip.php?article21911#sthash.5Rfu8y01.dpuf

Lt Col Ramazan aka Rama uyobora abakomando ba FARDC mu duce twa Rumangabo agafasha FDLR. - See more at: http://kigalitoday.com/spip.php?article21911#sthash.5Rfu8y01.dpuf

Partager cet article

Published by Gakumba Adrien
commenter cet article
22 janvier 2015 4 22 /01 /janvier /2015 15:50
Ubushinjacyaha burasabira Bandora gufungwa BURUNDU

“Turasaba urukiko ko rwemeza ko Bandora Charles ahamwa n’icyaha cya Jenoside, gihanishwa igihano cy’igifungo cya Burundu”;

Ahamwa n’icyaha cyo gucura umugambi wa Jenoside, nacyo gihanishwa igifungo cya burundu”;

Rukemeza ko ahamwa n’icyaha cy’ubufatanyacyaha mu mugambi wa Jenoside, nacyo gihanishwa gufungwa burundu”;

“ Icyaha cyo kurimbura imbaga, nacyo gihanishwa gufungwa burundu”;

Icyaha cyo kwica nk’icyaha kibasiye inyokomuntu, gihanishwa burundu”;

Rukemeza kandi ko ahamwa n’icyaha cyo kurema no gutunganya umutwe w’abagizi ba nabi, cyo gihanishwa gufungwa imyaka irindwi”.

Ibi ni ibyifuzo by’Ubushinjacyaha buhanganye na Charles Bandora ku byaha birimo ibya Jenoside n’ibyaha byibasiye Inyokomuntu bumurega, aho kuri uyu wa 22 Mutarama 2015 mu kurangiza urubanza, ubushinjacyaha bwasabiye uyu mugabo igifungo cya burundu.

Bushingiye ku kuba ibyaha bitanu muri bitandatu yari akurikiranyweho ndetse bugasaba ko Urukiko rubimuhamya bihanishwa igifungo cya burundu ndetse bikaba bigizwe n’impurirane mbonezamugambi, Ubushinjacyaha bwasabye Urukiko ko Bandora yahanishwa igifungo cya burundu nk’uko bigenwa n’amategeko ahana y’u Rwanda.

Bumaze gusaba Urukiko guhamya uregwa ibyaha byose uko ari bitandatu, umwe mu bahagarariye Ubushinjacyaha yagize ati “Bitanu muri ibi byaha binganya uburemere (Bihanishwa igifungo cya burundu), turasaba ko Bandora ahanishwa igifungo cya burundu,… Life sentence.”

Ubushinjacyaha bwabanje kugaragaza ko uregwa yitwaje umwanya ukomeye yari afite, igitinyiro n’icyubahiro akajya ayobora inama zateguraga ubwicanyi ndetse akabikoresha atanga amabwiriza ku bakoraga ubwicanyi nawe ubwe ngo akigira mu bitero nk’uko bamwe mu batangabuhamya b’Ubushinjacyaha babitangaje.

Nyuma yo kugaruka muri bimwe byagiye bigarukwaho mu iburanisha rimaze igihe cy’umwaka n’igice, abahagarariye Ubushinjacyaha bavuze ko ibyaha Bandora aregwa bikomeye cyane ndetse ko byakurikiwe n’ingaruka mbi.

Umwe yagize ati “Ibyaha Bandora aregwa bifite uburemere bukomeye cyane, kubera ingaruka byagize; umubare w’abo byahitanye ndetse n’umubare w’ababaye victims (abo byagizeho ingaruka) by’umwihariko muri Ngenda.”

Yakomeje avuga ko kandi kuba Bandora yari Visi perezida wa MRND, akaba yari ahagarariye abacuruzi ku Ruhuha bidakwiye gushidikanywaho ko gukangurira Abahutu kwica Abatutsi byari byoroshye kuri we bityo bikaba bikwiye gufatwa nk’impamvu z’inkomezacyaha.

Ubushinjacyaha bwavuze kandi ko kugira ngo umubare w’abishwe mu gihe cya Jenoside yakorewe Abatutsi ugere aho wageze hari abantu muri za Komini batanze imbaraga z’ifatizo harimo na Bandora.

Abunganira Bandora bo ngo Ubushinjacyaha bwazanye umwere mu rukiko

Me. Nizeyimana Boniface umwe mu bunganira Bandora yavuze ko ashingiye ku byagiye bitangazwa n’abatangabuhamya b’uruhande rw’uregwa kimwe n’abandi babiri mu batanzwe n’Ubushinjacyaha abona Ubushinjacyaha bwararengereye bukazana umwere mu rukiko.

Yagize ati: “ Ubushinjacyaha bwazanye un innocent (umwere) mu rukiko,.. kuko iyo urebye neza ibyatangajwe n’abatangabuhamya bacu, hakiyongeraho n’ibyatangajwe na Hakizimana Degaule ndetse na mugenzi we Baziga Emmanuel bose bashinjuye Bandora kandi bari batanzwe n’Ubushinjacyaha usanga umukiriya wacu ari umwere”.

Me. Nizeyimana kandi yavuze ko iyo hiyongereyeho kuba Ubushinjacyaha butaratanze ibimenyetso bidashidikanywaho ari ikimenyetso simusiga kigaragaza ko uwo bunganira ari umwere.

Yanavuze ko ko kuba ubushinjacyaha buvuga ko Bandora yaba yarayoboye icyo bwita inama yabereye iwe (kwa Bandora) ari ugukabya kuko ngo Bandora nta bumenyi buhagije cyangwa igitinyiro afite byo kuyobora inama mu gihe iyo nama yaba yaritabiriwe n’uwari Burugumesitiri n’abandi bayobozi bakuru.

Yagize ati “ Bandora mureba hano nta gitinyiro yari afite nk’uko Ubushinjacyaha bubivuga, ntiyari kubasha kuyobora inama atazi no gusoma nk’uko mujya mubibona ko bijya bimugora”.

Mugenzi we Me. Bikotwa Bruce nawe yunze mu rya mugenzi we avuga ko umukiriya wabo nta cyaha na kimwe mu byo aregwa gikwiye kumuhama kuko abatangabuhamya b’Ubushinjacyaha baranzwe no kwivuguruza no kuvuguruzanya ndetse hakaza no kugaragaramo n’abamushinjura.

Me Bikotwa yavuze kandi ko uretse kuba ubushinjacyaha bufite inshingano zo gushinja bufite n’inshingano zo gushinjura ku buryo we ngo yitabiriye iburanisha ry’uyu munsi yizeye ko Ubushinjacyaha buza gushinjura umukiriya we.

Yagize ati “ Nk’uko Ubushinjacyaha bufite n’inshingano zo gushinjura,..twaje tuzi ko buribushinjure umukiriya wacu ariko natunguwe no kumva bumusabira ibihano”.

Naho ku bijyanye n’ibyaha uko ari bitandatu, Me. Bikotwa yavuze ko kimwe nk’uko byatangajwe na mugenzi we hashingiwe ku byatangajwe n’abatangabuhamya baba abashinja n’abashinjura Urukiko rukwiye kubiheraho rugakira umukiriya wabo umwere, rukamurekura agataha.

Imyanzuro y’urubanza izasomwa kuwa 15 Gicurasi ariko uregwa yavuze ko ari kera kuko ngo akeneye kurenganurwa.

Perezida w’Inteko iburanisha uru rubanza amaze gutangaza italiki yo gusoma iyi myanzuro y’uru rubanza, Bandora yahise yaka ijambo; agira ati “ mubishyire vuba rwose,..murabona ko ndi kurengana”.

Bandora yagejejwe mu Rwanda ku cyumweru tariki 10-03-2013 yoherejwe n’ubutabera bwa Norvége ngo aryozwe ibyaha bya Jenoside yakorewe Abatutsi

Ni we wa mbere igihugu cyo ku mugabane w’Uburayi cyari cyohereje mu Rwanda ukekwaho Jenocide, nyuma y’uko Canada yo ku mugabane wa Amerika yohereje Mugesera nawe uri kuburana.

Bandora w’imyaka 59, yatawe muri yombi mu 2010 ku kibuga cy’indege muri Norvége aho yari yagiye avuye mu Ububiligi agendera kuri passport ya Malawi aho yakoreraga ubucuruzi.

Bandora wari umucuruzi ukomeye mu Bugesera akagira n’ijambo mu ishyaka rya MRND aho, akurikiranyweho gutanga amategeko yo kwica amagana y’Abatutsi bari bahungiye mu rusengero rwa Ruhuha rwari mu cyahoze ari Komini Ngenda, (Akarere ka Bugesera) hagati ya tariki 7 na 13 Mata 1994.

source Umuseke

Partager cet article

Published by Gakumba Adrien
commenter cet article
21 janvier 2015 3 21 /01 /janvier /2015 15:35
Jean Uwinkindi ntiyanyuzwe n’icyemezo cyo guhindurirwa abunganizi

Mu iburanisha ry’urubanza ubushinjacyaha bukurikiranyemo Pasiteri Jean Uwinkindi ku byaha bijyanye na Jenoside, kuri uyu wa gatatu tariki 21 Mutarama 2015, urukiko rwategetse ko Me Gatera Gashabana na Me Niyibizi Jean Baptiste bunganiraga Uwinkindi basimbuzwa kuko bivanye mu rubanza, ariko Jean Uwinkindi yavuze ko nta kifuzo yagejeje mu rukiko cyo gushakirwa abandi bunganizi.

Jean Uwinkindi uyu munsi yari yambaye amadarubindi, imbere ye hari impapuro nyinshi n’ikaramu, yageze mu rukiko nta muntu afite umwunganira kuko Me Gatera Gashabana na Me Niyibizi Jean Baptiste bamwunganira ntibagaragaye mu rubanza ndetse nta mpamvu zatanzwe z’uko gusiba.

Urugereko rwihariye mu Rukiko Rukuru ruburanisha ibyaha mpuzamahanga n’ibyambukiranya imipaka, ari na rwo ruburanisha Uwinkindi rwamusabye kugira icyo avuga ku iburanisha rya none.

Uwinkindi yabwiye urukiko ko ataburana adafite abamwunganira, ariko avuga ko bahari uretse ko hari ibyo bakiburana bitarakemuka.

Ubushinjacyaha na bwo bwahawe ijambo, buvuga ko abunganizi ba Uwinkindi Me Gatera Gashabana na Me Niyibizi Jean Baptiste bikuye mu rubanza hakurikijwe ko ubushize bavuye mu iburanisha ritarangiye, ndetse ngo n’uyu munsi batagaragaye mu rukiko.

Bityo ubushinjacyaha busaba urukiko kubimenyesha Minisiteri y’Ubutabera n’Urugaga rw’Abavoka kugira ngo Uwinkindi ashakirwe abunganizi bashya, urubanza rukomeze.

Jean Uwinkindi yahise amanika akaboko, avuga ko ubushinjacyaha atari bwo bumushakira abunganizi, avuga ko we afite abamwunganira uretse ko ngo bari mu rubanza rw’amafaranga kandi ngo rudatandukanye n’urubanza rwe.

Uwinkindi ati “Si ubushinjacyaha bunshakira abunganizi, sinshobora kunganirwa n’abaprokireri (procureur) kandi aribo mburana nabo.”

Nyuma y’umwanya munini, urukiko rwamaze mu mwiherero, rwafashe umwanzuro ko Uwinkindi ashakirwa abandi bunganizi bashya, ngo kuko abambere bikuye mu rubanza hakurikijwe ko batarangije iburanisha ryo ku wa 15 Mutarama 2015 n’uyu munsi bakaba batabonetse, rutegeka kandi ko ababishinzwe babikora vuba urubanza rukazakomeza tariki 5 Gashyantare 2015.

Iki cyemezo cy’urukiko nticyashimishije Jean Uwinkindi, yahise yaka ijambo agira ati “Ndagira ngo menyeshe inteko iburanisha n’abantu bose banyumva ko mfite abunganizi, byandikwe bityo.”

Uwinkindi yavuze ko ibimaze iminsi bitangajwe na Minisitiri w’Ubutabera Johnston Busingye, ko iyi ministeri imaze kwakira impapuro zishyuza amafaranga miliyoni 82,5 z’amafaranga y’u Rwanda, ndetse Minisiteri ikaba yaravuze ko ayo mafaranga yishyuwe andi akaba akishyuzwa atari ko bimeze.

Yagize ati “Abavoka banjye nubwo byakwijwe ku maradiyo ko bahembwe za miliyoni, nta mafaranga bahawe kuva mu kwezi kwa kabiri 2014, azabazwe abakozi ba Minisiteri. Mfite abunganizi, sinigeze mbisaba (guhindurirwa), byandikwe bityo.”

Abunganira Jean Uwinkindi, Me Gashabana na Me Niyibizi, bajuririye mu Rukiko rw’Ikirenga nyuma y’uko Minisiteri y’Ubutabera ifashe icyemezo cyo gusesa amasezerano bari bafitanye ajyanye no kunganira Jean Uwinkindi, ubu urubanza rwabo rukaba rwari rutararangira.

Iburanisha ry’uru rubanza rwa Jean Uwinkindi rizakomeza tariki ya 5 Gashyantare 2015.

source: umuseke

Partager cet article

Published by Gakumba Adrien
commenter cet article
21 janvier 2015 3 21 /01 /janvier /2015 15:30
Perezida Kabila ntashobora kurwanya FDLR mu gihe umuryango mpuzamahanga utamwemereye mandat ya gatatu

Perezida Kabila arasaba amahanga na Sociyeti Civile kumufasha kubona manda ya gatatu kugira ngo atange uburenganzira bwo kurasa umutwe wa FDLR nk’uko ikinyamakuru The Chimpreport kibivuga.

Mu gihe umuryango mpuzamahanga, sosiyeti sivile n’amashyaka atavuga rumwe n’ubutegetsi akomeje kwihanangiriza Kabila kudahirahira ngo yiyongeze manda ya gatatu, Perezida Kabila nawe ari kubigira iturufu yamuhesha kuguma ku butegetsi yitwaje FDLR.

Perezida Kabila avuga ko niba umuryango mpuzamahanga ushaka kurwanya FDLR ugomba kumwemerera kwiyongeza indi manda kugira ngo nawe abone gutanga uruhushya rwo kurasa FDLR. Aya makuru yavuye mu bategetsi bakuru mu buyobozi bwa Kabila hakoreshejwe ubutumwa bugufi bwa Telefoni, aravuga ko Perezida Kabila yasabye ko hagaragazwa koko niba icyi cyifuzo cye cyahabwa agaciro.

Hagati aho Loni by’umwihariko ishami ryawo rya Monusco ryagiranye ikiganiro n’abanyamakuru kuwa gatanu ushize maze ivuga ko yiteguye guha ubufasha guverinoma ya RDC mu kurwanya imitwe yitwaje intwaro irimo FDLR.

Kugeza ubu uretse ibitero ishobora kugaba mu gihe ihawe uburenganzira na RDC nta kindi ivuga ku cyifuzo cya Perezida Kabila cyo kumufasha kubona manda ya gatatu kugira ngo abone gutanga uburenganzira bwo kurasa FDLR.

Kugeza ubu ibyumweru 2 birashize umutwe wa FDLR uhawe nyirantarengwa yo kuba washyize intwaro hasi abawugize bagasubizwa mu buzima busanzwe, imiryango mpuzamahanga igizwe na SADC, ICGLR na Loni biciye mu ngabo zayo zidasanzwe bose bari bafashe umugambi wo kurasa FDLR nyuma y’itariki ya 2 Mutarama 2015.

Iki kinyamakuru gikomeza kivuga ko Perezida Kabila yatinye gufata icyemezo cyo kurasa uyu mutwe nk’uko yotswaga igitutu na Loni.

Vuba aha muri uku kwezi Perezida Kabila yari yasabye ingabo za Loni ziri muri Kongo gutangira kugaba ibitero kuri uyu mutwe wa FDLR bitarenze tariki ya 18 Mutarama 2015. N’ubwo yasabye Loni kugaba ibitero kuri FDLR, Perezida Kabila ntiyigeze atanga icyemezo ntakuka cyo kurasa uyu mutwe.

Kugeza ubu ingabo za Loni zivuga ko zishaka guhashya uyu mutwe wa FDLR hamwe n’indi mitwe yose yitwaje intwaro ikorera muri iki gihugu ariko nyamara leta ya RDC iri gukomeza guseta ibirenge mu gutanga icyemezo cya Burundu cyo kurasa FDLR.

Mu cyumweru gishize Perezida w’Afurika y’epfo Jacob Zuma yahuye na Perezida wa Angola Eduardo Dos Santos bagirana ibiganiro mu ibanga ahanini byibanze kuri uyu mutwe wa FDLR.

Muri iyi nama Perezida Dos Santos yavuze ko FDLR ikwiriye kwamburwa intwaro ku mbaraga ko nta mishyikirano n’uyu mutwe.

Minisitiri w’ububanyi n’amahanga w’u Rwanda Louise Mushikiwabo biciye kuri Twitter yavuze ko ashimira Perezida wa Angola ku kuba yumva ikibazo akagishakira umuti agamije ahanini gushakira amahoro arambye akarere k’ibiyaga bigari.

Ku kuba FDLR isaba ko Perezida Kagame yagirana ibiganiro nayo, leta y’u Rwanda ivuga ko idashobora na limwe kugirana ibiganiro n’uyu mutwe wasize ukoze Jenoside yakorewe abatutsi mu 1994.

Amakuru iki kinyamakuru gikura muri leta ya RDC aravuga ko Tanzaniya, Afurika y’epfo na Perezida Kabila batanze amacumbi ahenze muri ibi bihugu kuri aba barwanyi ba FDLR.

Ibi bihugu biraseta ibirenge mu gikorwa cyo kugaba ibitero kuri uyu mutwe wa FDLR ahanini kubera amasezerano ibi bihugu byagiranye ubwabyo ndetse n’ayo byagiranye n’umutwe wa FDLR agamije ubucuruzi.

source : rushyashya

Partager cet article

Published by Gakumba Adrien
commenter cet article
21 janvier 2015 3 21 /01 /janvier /2015 15:21
Musanze : 16 bakekwaho gukorana na FDLR barasabirwa igifungo cya Burundu


Nyuma y’aho abantu batanu bari basigaye kumvwa mu rubanza rw’abantu 16 bakekwa ho gukorana n’umutwe wa FDLR bahawe umwanya wo kwiregurra mu rubanza rubera mu Rukiko Rukuru, Urugereko rwa Musanze, kuwa kabiri tariki 20/01/2015.
Ubushinjacyaha bukaba bwasabiye aba bose 16 gufungwa buru
n
du.

Abumviswe kuri uyu wa kabiri ni Ndengejeho Saidi, Uwimana Fabien, Barisesa Jonas, Habyarimana Pheneas na Habanabakize Jean Chrysostome.

Ndengejeho Saidi yahakanye ibyaha ashinjwa n’ubushinjacyaha birimo ubufatanyacyaha mu mugambi wo kuvutsa umudendezo igihugu no gutunga imbunda mu buryo bunyuranyije amategeko. Yavuze ko kuva muri Gicurasi 2010 kugeza muri Mata 2014 yari afunzwe kubera icyaha cy’ubujura kandi ngo muri icyo gihe ni ho ibyo byaha byakozwe.

Ubushinjacyaha bwavugaga ko ubwo bufatanyacyaha abushinjwa mu nyandiko zakozwe na Nzirorera mu bugenzayaha no mu bushinjacyaha, ariko urukiko rusabye Nzirorera kugira icyo abivugaho abitera utwatsi avuga ko ntabyo azi.

Uwimana Fabien bakunda kwita “Nsenga” na we nawe muri iri burana yahakanye ibyaha ashinjwa n’ubushinjacyaha. Buvuga ko mu nyandiko uwitwa Ruhangaza yakoreye mu bushinjacyaha n’ubugenzacyaha avuga ko yajyanye na Uwimana kwiga imbunda kwa Nzirorera.

Mu kwiregura kwe, Nsenga yavuze ko afitanye amakimbirane na Ruhangaza ariko na Nzirorera wagaragaje kuburana yemera icyaha kandi atarya iminwa ku bikorwa yari ayoboye, ubwo yitabazwa n’urukiko yavuze ko Nsenga yaje iwe amuha ikizamini cyo gufungura imbunda akongera akayiteranya arabikora kuko yari yaramubwiye ko azi imbunda nk’umuntu wabaye umu-local defense.

Barisesa Jonas uzwi ku izina rya “Bolingo” mu kuburana kwe yemeye icyaha cy’ubugambanyi mu mugambi wo kuvutsa umudendezo igihugu. avuga ko inshuro ebyiri yashatse kujya muri Repubulika iharanira demokarasi ya Kongo (RDC) guhura n’umuyobozi wa FDLR ariko ntibyamukundira afata icyemezo cyo guhagarika imikoranire ye na FDLR.

Ubushinjacyaha bwari buhagarariwe muri uru rubanza na Augustin Nkusi, buvuga ko Barisesa yari mu mfura za FDLR kuko ari mu ba mbere bakanguriwe kwinjiramo kandi ibyo avuga ko yahagaritse gukora na yo nta kimenyetso na kimwe kibigaragaza.

Uru rubanza rwari rukurikiranwemo abangabo 16 bakekwaho kwinjiza imbunda mu gihugu ndetse n’amasasu ku buryo bwa rwihishwa, kubitunga ku buryo butemewe n’amategeko ndetse no gushaka guhirika ubutegetsi buriho mu Rwanda.

Muri uru rubanza humvikanyemo abinjizaga intwaro mu gihugu bazifatanwe ari 15, abatwaraga amasasu muri teremusi mu buryo bwo kujijisha inzego z’umutekano kugira ngo zigirengo baragemuye, abatwaraga imbunda mu mifuka y’ibirayi bakagenda bazinyanyagiza mu Mujyi wa Musanze, hakaba n’abashakaga amayira yo kuzinjiza mu gihugu bakanaherekeza abazizanye.

Muri uru rubanza kandi humvikanyemo abatangaga amafaranga yo kuzana imbunda mu gihugu zikurwa muri Kongo ku birindiro bya FDLR ndetse n’abacungaga inzego z’umutekano mu muhanda kugira ngo bace polisi mu rihumye.

Nkuko bigaragazwa n’Umushinjacyaha muri uru rubanza, Nkusi Augustin avuga ko abakorana na FDLR bose usanga bafite utuzina tw’utubyiniriro mu buryo bwo kujijisha inzego z’iperereza ndetse n’abaturage kugira ngo ibibagenza bitamenyekana.

Uyu Mushinjacyaha ahamya ko usanga ku mazina yabo hagenda hiyongeraho alias kandi ugasanga ari ryo rizwi cyane mu baturage kurusha amazina ye nyakuri.

Muri aba baburanaga harimo nk’uwitwa Habanabakize Chrisostome Alias Mapine, Unyuzimfura Pierre Alias Bizimana, Nshogozabahizi Fidele uzwi ku izina rya Kibonumwe ndese na Alias Kibamba n’andi menshi nk’ayo.

Hagendewe ku byaha aba bagabo 16 baregwa, ubushinjacyaha bugendeye ku ngingo ya 461 mu gika cya kabiri n’ingingo ya 676 zo mu gitabo cy’amategeko mpanabyaha mu Rwanda, basabiwe igihano cya burundu hatavuyemo n’umwe.

Ari abaregwa ari ababunganira, basabye ko bagabanirizwa igihano, bamwe basaba ko bafungurwa, abandi bemera ibyaha banabisabira imbabazi.

Uru rubanza rwaburanishirizwaga mu rukiko rukuru urugereko rwa Musanze rwaburanishwaga mu mizi, ruyobowe n’Umucamanza Munyawera Sophonie. Biteganyijwe ko ruzasomwa imyanzuro ku itariki 19 Gashyantare uyu mwaka wa 2015.

source: rushyashya

Partager cet article

Published by Gakumba Adrien
commenter cet article
19 janvier 2015 1 19 /01 /janvier /2015 15:06
DRC: Perezida Kabila, Zuma na dos Santos mu nama iza kwiga no kuri FDLR

Iyi nama iteganyijwe kuri uyu wa mbere mu mujyi wa Kinshasa hagati ya Perezida, Joseph Kabila, wa Repubulika iharanira Demokarasi ya Congo, Jacob Zuma wa Africa y’Epfo na Jose Eduardo dos Santos wa Angola, mu byigwa hari ubufatanye hagati ya Angona na DRC ariko n’umutekano nk’uko ibitangazamakuru muri Angola bibivuga.

Minisitiri muri Angola ushinzwe Africa n’Uburasirazuba bwo Hagati, Joaquim Espírito Santo, yabwiye radio y’igihugu ya Angola, abakuru b’ibihugu baza gusuzuma ibijyanye no gukoresha ingufu za gisirikare ku nyeshyamba za FDLR zimaze igihe ziteza umutekano muke mu Burasirazuba bwa Congo Kinshasa, ndetse n’akere.

Uyu muyobozi avuga ko nyuma y’aho FDLR inaniriwe kubahiriza igihe yari yahawe ngo ibe yarambitse intwaro hasi, hari ibigomba gukorwa muri byo hakabamo no gukoresha imbaraga za gisirikare mu kwambura intwaro FDLR.

Avuga kuri iyi nama ngishwanama yagize ati “Kubonana birakenewe kugira ngo hasuzumwe uko ibintu byakorwa no kureba ingaruka zinyuranye zabaho igihe habaye igitero cyo kwambura intwaro.”

Espirito Santos avuga ko bikwiye ko Uburasirazuba bwa Congo Kinshasa bwabona umutekano usesuye kugira ngo hakorwe ibikorwa by’iterambere.

Ikinyamakuru Romandie cyo cyatangaje ko amakuru gikesha AFP ari ay’uko Perezida dos Santos wa Angola ari na we uyoboye Inama mpuzamahanga yo mu bihugu bigari (ICGLR), aza gusinyana amasezerano y’ubufatanye n’ubuhahirane na Joseph Kabila cyane mu bijyanye n’ubwikorezi.

Romandie cyavuze ko Angola na DRC baza gusinya amasezerano yo gusubukura ingendo z’indege hagati ya Luanda na Kinshasa, dore ko hari hashize imyaka itatu sosiyete y’indege muri Angola TAAG ihagaritse ingendo zigana Kinshasa bitewe n’ibibazo ibihugu byombi byagiranye.

Angola yari yirukanye abaturage ba Congo Kinshasa babaga Luand abadafite ibyangombwa, Congo Kinshasa na yo yirukana Abanyangola ibihumbi n’ibihumbi babaga i Kinshasa.

Aba bakuru b’ibihugu ngo baba bari buganire n’iby’iyubakwa ry’urugomero rw’amashanyarazi runini ku isi Inga, rushobora kuzafasha DRC kugurisha amashanyarazi mu bindi bihugu, magingo aya Africa y’Epfo ikaba yaramaze kugirana amasezerano n’icyo gihugu ku buryo na Angola yaba ifite ubushake bwo kugura amashanyarazi muri DRC azava kuri Inga.

Iyi nama ikurikiye iyo Perezida Jacob Zuma yagiranye na Jose Eduardo dos Santos muri Angola mu cyumweru gishize, ikaba yarabaye mu muhezo.

src: Umuseke

Partager cet article

Published by Gakumba Adrien
commenter cet article
15 janvier 2015 4 15 /01 /janvier /2015 15:12
Nta weguye kubera impamvu ze bwite, haba hari ibibazo badashobora gusubiza

src: umuseke

15 Mutarama 2015 – Mu kiganiro cya mbere n’abanyamakuru muri uyu mwaka wa 2015 Perezida Kagame yasubije ibibazo bitandukanye, ibya FDLR, iby’icyerekezo 2020, icy’iterabwoba riherutse mu Bufaransa, ndetse n’icyabayobozi b’uturere baherutse kwegura mu Rwanda ni bimwe mu byo yatinzeho. Kuri iki cyanyuma yavuze ko nta muyobozi wegura ku mapmvu ze bwite ahubwo hari ibibazo baba badashobora gusubiza. Ari nayo mpamvu bamwe batabwa muri yombi.

Perezida Kagame mu kiganiro n’abanyamakuru kuri uyu wa 15 Mutarama 2015

Plan B kuri FDLR ni ukurinda inkiko z’u Rwanda

Ikibazo cya mbere yabajije cyari ku bivugwa cyane ubu byo kwambura intwaro umutwe wa FDLR, asubiza mu buryo butaziguye ko yaba akabije avuze ko ibintu biri kugenda uko byakabaye bigenda akurikije amateka y’ikibazo u Rwanda rufitanye na FDLR kimaze imyaka irenga icumi.

Avuga ko ibyakomeje kubaho kuri iki kibazo bidafasha u Rwanda na gato ugereranyije n’ibyaha abagize uwo mutwe bakoze haba muri Congo ndetse na Jenoside ngo byose birivugira.

Ati “Mufite amaso murareba, mufite amatwi murumva n’ubwenge muratekereza. FDLR ifite isano ya hafi na Jenoside iracyari aho ariko indi mitwe nka ADF, FNL n’indi abo basirikare ba UN bari kuyishyira hasi.

Ariko iyo bigeze kuri FDLR baravuga bati mube muretse… harimo abana… harimo sinzi…ni benshi…bavanze n’abasivili…hari ibisobanuro byinshi bitangwa iyo bigeze kuri FDLR, bivuze ko hari impamvu namwe mukwiye kuba muzi kugeza ubu. None murumva nabirenzaho iki birenze ibyo muzi n’ibyo mubona kugeza ubu?

Perezida Kagame avuga ko hari abantu bamwe b’imbaraga baakomeje kugaragaza ibya Jenoside, impamvu yayo, uko yateguwe, abayikoze ariko ngo byagera ku kibazo cya FDLR ntibagire icyo bashaka kugikoraho…ati “ndumva rero nanjye ntacyo nabirenzaho.”

Abajijwe icyo u Rwanda rwiteguye gukora mu gihe umutwe wa FDLR utambuwe intwaro yahise avuga ko u Rwanda ruzakomeza kubaka ubushobozi mu kurinda umutekano warwo kugira ngo hatabaho gutungurwa mu gihe habaho ikibazo cy’umutekano mucye giturutse ku ruhande urw’ari rwo rwose rw’umupaka.

Ati “Dufite uburenganzira n’ubushobozi bwo kurinda icyo aricyo cyose cyaturuka ku ruhande. Muzandenganye nihagira igituruka ahandi kikaduhungabanya.”

Iby’icyerekezo 2020 ngo byinshi byagezweho

Perezida Kagame yasobanuye ko mu byo abanyarwanda bihayeho intego n’icyerekezo cya 2020 ngo byinshi bigenda bigerwaho.

Ati “Ntabwo ibyo ari ibintu tuzabazanira bivuye hanze, ni ibintu tuzakorana nabo (abanyarwanda) kugira ngo duhindure ubuzima bwacu n’ubw’igihugu, ntabwo ari impano yo kuvana hanze, ni ibintu twifitemo. Ibyinshi byagezweho hari ibitaragerwaho kandi hari ingamba zidufasha kugira ngo tuzabigeraho ibindi hari ibisobanuro impamvu biri aho bigeze.

Icyo nasezeranya abanyarwanda ni uguhera kubyo nabo ubwabo babona cyangwa bamaze kugeraho. Ubundi ni uko twakomeza tugakora ibyo tuzi byatugirira akamaro n’ibitaragerwaho bikagerwaho.”

Abaminisitiri benshi muri ‘Cabinet’ bari muri iki kiganiro nabo; uhereye ibumoso Busingye w’Ubutabera, Harerimana w’Umutekano, Gatete w’Ubukungu na Musoni w’ibikorwa remezo

Ibyabaye mu Bufaransa biteye urujijo

Asubiza ku kibazo cy’iterabwoba ku isi yari abajijwe Perezida Kagame yavuze ko isi ifite ibibazo byinshi, birimo ibizanwa n’umutekano mucye harimo iterabwoba mu bice bitandukanye by’isi, ibindi byibasira isi yose nk’ihungabana ry’ubukungu, Ebola yahungabanyije ubukungu bwa Africa y’iburengerazuba n’ibindi…

Avuga ariko ko abantu bagomba kumenya no kumva impamvu zimwe na zimwe z’ibibazo bimwe abantu bahura nabyo ku Isi.

Ati “Bimwe mu bizwi impamvu zabyo ikibazo gikomeye ni uburyo izo mpamvu zikorwaho, nicyo kibazo gikomeye, abantu bigizayo impamvu ya nyayo bagashaka gukemura icyabivuyemo gusa.

Ibyabaye mu Bufaransa narabikurikiranye cyane ndasoma cyane ndakurikira ariko biteye urujijo.”

Perezida Kagame yigengesereye ndetse anafata umwanya munini abisobanuraho, yavuze ko nta muntu utababazwa no kumva ko hari abantu binjira mu nzu bakarasa abantu kuko bashushanyije ibintu runaka.

Avuga ko nta muntu utakwishimira ko hari aho abantu bafite uburenganzira n’ubwisanzure bwo kuvuga ibyo bashaka ndetse n’ubwitangazamakuru, anatanga urugero ko nawe ubwe hari aho yabonaga bamushushanya uko bishakiye kandi ngo yibaza ko nta nkurikizi ku babikora.

Ariko kandi avuga ko isi iriho abahezanguni mu bintu bitandukanye, haba muri ubwo burenganzira n’ubwisanzure mu byo batangaza ndetse no mu by’ukwemera n’iyobokamana.

Yibaza impamvu niba ugiye gukora ‘cartoon’ uzi neza ko hari abo ziteza umujinya w’umuranduranzuzi utabireka kugira ngo udahagurutsa uwo mujinya wabo.

Yibaza kandi umujinya w’abantu bahaguruka bakajya mu nzu bakica abantu kubera ibyo, akavuga ko nabyo bibabaje cyane.

Ati “Byanze bikunze abo bahezanguni mu itangazamakuru n’abo bahezanguni mu myemerere bagomba gusakirana. None rero isi izabana ite mu mutuza niba hari abo bantu baheza inguni gutyo..?

Dufite ariko kandi n’abantu ku isi bakoresha abo bahezanguni mu nyungu zabo bwite….Birasaba rero kwitonda no kureba neza impande zose

Asoza kuri iki yagize ati “Hano mu isi yacu umutekano niwo dushyize imbere, iterambere ryacu niryo rya ngombwa. Gusa natwe iyo abantu baje hano bagatera za grenade abantu bagapfa byitwa amakimbirane ya politiki ariko umuntu yakwica abantu abasanze mu nzu bigakomera isi igaharara.”

Turakennye ariko siko twari tumeze kandi siko tubyifuza

Asubiza ikibazo cyabajijwe ku bukene bw’urwego rw’abikorera mu Rwanda ngo rukiri hasi, yabishimangiye, yemeza ko koko uru rwego ngo kimwe n’izindi nyinshi cyane mu gihugu bigikennye, gusa ngo uko biri none siko byari bimeze mu myaka itatu ishize, nubwo bwose izo nzego zigikennye.

Ati “Ibi niko bimeze no mu itangazamakuru, mu bukungu, mu bikorera yewe no muri Guverinoma. Ariko bigenda bitera imbere hari itandukaniro rinini cyane ugereranyije n’uko byari bimeze mu myaka ishize.

Nizera ko buri rwego hano mu gihugu rwateye imbere ariko turacyakennye ntituragera aho dushaka kuba nubwo aho turi ari heza ugereranyije n’aho twahoze.”

Nta wegura ku mpamvu ze bwite

Avuga ku kwegura kw’abayobozi b’uturere bimeze iminsi bivugwa, Perezida Kagame yavuze ko ibibazo byo kwegura kubera imikorere mibi y’abantu ngo bitazagira ubwo bitabaho. Ko icya ngombwa ari ukugira ubushobozi nk’igihugu bwo kubikumira no kubisubiza mu buryo bwabyo.

Ati “Begura kubera ko bafite ibibazo badashobora gusubiza. Niyo mpamvu bakurikiranwa n’ubutabera, hari ibimenyetso bya ngombwa biba bihari, hari n’ubwo abantu babanza gukurikarana kugira ngo umuntu arebe uko byanganaga. Hari igihe uba uzi bibiri wakurikirana ugasanga ni 10.”

Perezida Kagame avuga ko uwabaye umuyobozi kugira ngo akurikirane ibibazo bye akoreshe ubushobozi bw’abandi, ngo ku bw’amahirwe ye hari ibitamenyekana ariko ngo iyo bimenyekanye ubibazwa arabisobanura.

Perezida Kagame yumva ikibazo cy’umunyamakuru wabajije mu gifaransa

Ba Minisitiri Mushikiwabo na Kaboneka muri iki kiganiroc

Abaminisitiri benshi muri ‘Cabinet’ bari muri iki kiganiro nabo; uhereye ibumoso Busingye w’Ubutabera, Harerimana w’Umutekano, Gatete w’Ubukungu na Musoni w’ibikorwa remezo

Abaminisitiri benshi muri ‘Cabinet’ bari muri iki kiganiro nabo; uhereye ibumoso Busingye w’Ubutabera, Harerimana w’Umutekano, Gatete w’Ubukungu na Musoni w’ibikorwa remezo

Perezida Kagame yumva ikibazo cy’umunyamakuru wabajije mu gifaransa

Perezida Kagame yumva ikibazo cy’umunyamakuru wabajije mu gifaransa

Ba Minisitiri Mushikiwabo na Kaboneka muri iki kiganiro

Ba Minisitiri Mushikiwabo na Kaboneka muri iki kiganiro

Perezida Kagame avuga ko umuyobozi wese ufite ibyo abazwa agomba kubisobanura

Perezida Kagame avuga ko umuyobozi wese ufite ibyo abazwa agomba kubisobanura

Partager cet article

Published by Gakumba Adrien
commenter cet article
15 janvier 2015 4 15 /01 /janvier /2015 15:07
Birindabagabo ukekwaho gukora Jenoside i Rukumberi yagejejwe mu Rwanda

Kuri uyu wa gatatu Saa mbiri z’ijoro zirenzeho iminota mike Police Mpuzamahanga ibinyujije kuri Police ya Uganda yashyikirije ubutabera bw’u Rwanda Birindabagabo Jean Paul ukekwaho kugira uruhare muri Jenoside yakorewe Abatutsi muri 1994 mu cyahoze ari Komini Sake Segiteri ya Rukumberi muri Perefegitura ya Kibungo akaba yahise yoherezwa kuri Station ya Police ya Kicukiro.

Amaze gushyikirizwa Polisi y’u Rwanda

Uyu mugabo wahoze ari Pasteur mu idini rya ADEPR mu cyahoze ari Komine Sake mu Segiteri ya Rukumberi yavukiye muri Komini Karago ariko Jenoside iba ari Pasteur muri Sake.

Birindabagabo w’imyaka 59 yafatiwe muri Uganda ari naho yaje avanwa, ni nyuma y’uko hashyizweho impapuro zo kumuta muri yombi zashyiriweho kuwa 30 Kamena 2014.

Callixte Kabandana umwe mu barokotse Jenoside yakorewe Abatutsi muri kariya gace yabwiye Umuseke ko yibuka ko taliki ya 08 Mata 1994 Birindabagabo yinjiye mu rusengero Abatutsi bari bahungiyemo afata iya mbere arasa undi Pasteur w’Umututsi wasengeraga abari bahahungiye abaragiza Imana nyuma ngo abasirikare bari bamuherekeje batangira kwica abandi Batutsi mu rusengero.

Kabandana avuga ko muri iriya Komini hari abantu batatu bavuga rikijyana aribo Birindabagabo Jean Paul, Burugumesitiri Rutayisire Erneste na Depite Mutabaruka Sylivan.

Aba babiri tuvuze nyuma ntibarafatwa ariko Kabandana ukuriye ishyirahamwe ry’abarokotse Jenoside yakorewe Abatutsi muri 1994 bari batuye Rukumberi avuga ko bikekwako bari mu gihugu cya Malawi.

Kabandana yaboneyeho gusaba inzego bireba ko uyu ukekwaho kugira uruhare muri Jenoside yakorewe Abatutsi muri Rukumberi yazaburanishirizwa aho bamushinja ko yakoreye ibyo byaha.

Birindabagabo yaje n’indege ya Rwandair

Birindabagabo amanuka mu ndege ya Rwandair

Birindabagabo amanuka mu ndege ya Rwandair

Partager cet article

Published by Gakumba Adrien
commenter cet article
14 janvier 2015 3 14 /01 /janvier /2015 13:35
Umuturage wa Congo ubonana kenshi na FDLR yaganiriye n’Umuseke

Umuturage w’umunyacongo utuye muri teritwari ya Walikare ahitwa Kitshanga ahegereye muri teritwari ya Masisi yaganiriye n’umunyamakuru w’Umuseke i Rubavu, amusaba kudatangaza amazina cyangwa ifoto bye kuko ikiganiro bagiranye cyamugiraho ingaruka mbi, yemeza ko we n’abaturanyi be ari bo bantu bibaza igihe n’uburyo FDLR izaranduka mu gihugu cyabo, akavuga ko ikizere bafite ari gike kuko aba barwanyi ngo basa n’abivanze n’ingabo za FARDC muri aka gace.

Abarwanyi ba FDLR ngo bivanze cyane na FARDC

Uyu muturage avuga ko umunsi ku munsi babona abarwanyi ba FDLR iwabo bamwe muri bo bambaye imyenda y’ingabo za FARDC ndetse kenshi bari mu ngabo za FARDC.

Ati “No muri Batayo za FARDC tubabonamo bigatuma iyo twumvise bavuga ngo MONUSCO izafatanya na FARDC kurasa FDLR twibaza uko bizagenda.

Raporo y’abitwa impuguke za Loni iherutse gutangaza ko ingorane ikomeye izabaho mu kurwanya umutwe wa FDLR ari uko abarwanyi bawo bivanze n’ingabo za Leta kuko bakorana bya hafi na hafi mu bucuruzi bw’amabuye y’agaciro, imbaho n’amahembe y’inzovu.

Ubunani bushize uyu muturage avuga ko iwabo bari biteze cyane kureba iby’ishyirwa mu bikorwa ryo kwambura intwaro FDLR amahanga yavugaga ko bizaba tariki 02 Mutarama 2015.

Ati “Nubwo twari tubyiteze cyane ariko twibazaga uburyo bizakorwa, bamwe bibwira ko bari bubyuke bumva ibibunda biremereye nko mu gihe barwanyaga M23, ariko abandi tubona ko bitanashoboka kuko aba FDLR benshi babana n’ingabo za Leta, bacye nibo baba mu mashyamba barinda abayobozi ba FDLR kuko bo barazwi ntibakwivanga mu ngabo za Leta.”

Uyu muturage avuga ko nk’ahitwa Binza muri Masisi (ni muri nka 30Km) uvuye aho atuye i Kitshanga muri Walikare avuga ko aha hari uruvange rugaragara rw’abasirikare ba Leta FARDC n’abarwanyi ba FDLR.

Ati “Aba kenshi baza iwacu mu byaro bambaye imyenda ya FARDC bakadusaba amafaranga, tukabakamira amata. Benshi muri bo baba bavuga ikinyarwanda bakatubwira ko iwabo ari mu Rwanda kandi intego yabo ari kuzasubira mu gihugu cyabo bagiye kukiyobora.”

Uyu muturage avuga ko we n’abaturaye agace k’uburasirazuba bwa Walikare na za Misisi bibaza uburyo FARDC izarwanya FDLR kandi ibarimo.

Uyu avuga ko bo amagambo y’abanyepolitiki basigaye bayabona nk’umukino kuko ibiri iwabo mu byaro bya Kivu ya ruguru bitandukanye n’ibyo abantu bibwira.

We yemeza ko FDLR n’abazaza baje kuyirasa bashobora kwisanga nta muntu barasana nawe kubera uko babona imibanire y’aba barwanyi n’ingabo za Leta.

Umuvugizi wa Leta ya Congo Lambert Mende Omaranga aherutse gutangaza ko batazarasa FDLR ku gitutu cy’Umuryango w’Abibumbye ko atari ibintu byo gukora huti huti. Ni nyuma y’amezi atandatu ya nyirantarengwa uyu mutwe wari wahawe.

Umutwe w’iterabwoba wa FDLR uregwa na Leta y’u Rwanda nk’uwiganjemo abasize bakoze Jenoside yakorewe Abatutsi kandi ugifite ingengabitekerezo y’ivanguramoko n’ubwicanyi. Minisitiri w’ububanyi n’amahanga w’u Rwanda akaba aherutse kuvuga ko ikibazo kinini FDLR iteje ku Rwanda atari icya gisirikare ahubwo ari ingengabitekerezo yayo.

source: Umuseke

Partager cet article

Published by Gakumba Adrien
commenter cet article
6 janvier 2015 2 06 /01 /janvier /2015 17:39

Umugabo wa Ingabire Umuhoza Victoire umuyobozi w’ishyaka FDU Inkingi Lin Muyizere yamaze kwamburwa ubwenegihugu yari yarahawe n’igihugu cy’u Buholandi nyuma y’aho iki gihugu cy’u Buholandi gitahuye ko afitanye ubufatanyacyaha n’abasize bakoze Jenoside yakorewe abatutsi mu 1994.

Kuba yaragiye gutanga ubuhamya bushinjura umwe mu bahamijwe icyaha cya Jenoside ufungiye i Arusha muri Tanzaniya ni imwe mu mpamvu nyamukuru itumye Lin Muyizere umugabo wa Ingabire Victoire yamburwa ubwenegihugu yari yarahawe n’igihugu cy’u Buholandi.

Service zishinzwe abinjira n’abasohoka mu gihugu cy’u Buholandi n’ubwo zirinze gutangaza izina ry’uwo yagiye gushinjura, zihamya ko mu 1998 Lin Muyizere yagiye gushinjura i Arusha muri Tanzaniya nawe agenda yahinduye amazina ye nyakuri agamije kubeshya kugira ngo uwo mufungwa agirwe umwere kandi biziwi neza ko yakoze Jenoside kandi uru rukiko rukaza kumuhamya iki cyaha.

Mu maso ya service ishinzwe abinjira n’abasohoka mu Buholandi ibi bihamya icyaha Lin Muyizere icyaha cy’ubufatanyacyaha muri Jenoside yakorewe abatutsi mu 1994. Ibi kandi akaba yarabyiyemereye ubwo izi service zamuhamagaraga ngo agire icyo asobanura.

Mu mpera za Nzeri 2014 Service zishinzwe abinjira n’abasohoka mu Buholandi zatumije Lin Muyizere kuza gufata Pasiporo nshya zamugeneye yagombaga guta agaciro ku itariki ya 1 Mutarama 2015 ari naho yahitaga abura burundu ubu bwenegihugu.

Ikinyamakuru Le Monde dukesha iyi nkuru nikivuga niba nyuma yo kwamburwa ubu bwenegihugu azahita yirukanwa mu gihugu cyangwa niba hari izindi nkurikizi zizakurikiraho

Umugabo wa Ingabo Victoire yambuwe ubwenegihugu

Partager cet article

Published by Gakumba Adrien
commenter cet article